कर्णाली स्वास्थ्य विज्ञान प्रतिष्ठान शिक्षण अस्पताल जुम्लाले यहाँका स्थानीय तहमा स्वाब संकलन गर्न स्वास्थ्यकर्मीको टोली गाउँगाउँमा परिचालन गरेको छ । एक नगरपालिका सहित ८ वटा स्थानीय तहमा दुइ जना स्वास्थ्यकर्मी परिचालन गरेको हो । प्रतिष्ठानबाट खटिएको टोलीले स्थानीय तहको पायक पर्ने स्थानमा बोलाएर स्वाब संकलन गरेको थियो । एक दिनमा ८ सय ४९ जनाको स्वाब संकलन गरेको प्रतिष्ठानमा ल्याइसकेको निर्देशक डा. मंगल रावलले जानकारी दिए । उनका अनुसार जुम्लालाइ कोरानामुक्त बनाउन स्वास्थ्यकर्मीको टोली स्वाब परिक्षण गर्न गाउँगाउँमा पठाइएको छ ।
प्रतिष्ठानबाट खटिएको टोलीले स्थानीय तह संग समन्वय गरेर स्थानीय तहका स्वास्थ्यकर्मीको समेत सहयोग लिइएको थियो । कर्णाली प्रदेश सरकारको १० जिल्लामा १० हजार स्वाब संकलन गरी कोरोना परीक्षण गर्ने उद्देश्य अनुसार जुम्लामा ८ सय ४९ जनाको स्वाब संकालन गरिएको कर्णाली स्वास्थ्य विज्ञान प्रतिष्ठान शिक्षण अस्पताल जुम्ला अस्पताल निर्देशक रावलले बताए । उनले भने,‘ यहाँका हरेक वडाका १० जना ब्यक्तिको स्वाब लिइएको छ । ’ परिक्षणका क्रममा आउने नतिजाका आधारमा थप सतर्कता अपनाउने प्रतिष्ठानले जनाएको छ ।
कर्णाली प्रतिष्ठानका अनुसार पातारासी गाउँपालिका ७०, चन्दननाथ नगरपालिका ५८, तातोपानी गाउँपालिका एक सय ५०, तिला ७०, हिमा ३७, कनकासुन्दरी दुई सय, गुठीचौर ९५ र सिंजा २ सय ९ जना गरी ८ सय ४० जनाको स्वाब संकलन गरिएको छ । स्वाब संकलन पछि मंगलबार देखि नै कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा कोरोना पिसिआर परीक्षण गर्ने तयारी गरिएको छ ।
लकडाउन अवधिभर जुम्ला १० हजार ९ सय ७० जना नागरिक भित्रिएका छन् । १ सय ८२ जना क्वारेन्टाइनमा बसेका छन् भने ९ सय ३० जना १४ दिनपछि घर फिर्ता भएको जिल्ला प्रशासन कार्यालय जुम्लाले सार्वजनिक गरेको तथ्यांकमा उल्लेख गरिएको छ । ५ सय १६ जना होम क्वारेन्टाइनमा बसेका छन् । त्यसैगरी अहिलेसम्म जुम्लामा ४ सय १४ जनाको पिसिआर र २ सय ६१ जनको आरडीटी परीक्षण गरिएकोमा सवै जनाको रिपोर्ट नेगेटिभ आएको जनाएको छ ।
प्रकाशित मिति: सोमवार, बैशाख २९, २०७७, ०८:०६:००
